| |
|
ههڵبژارده |
کۆمەڵەى رۆژنامهنووسانی عێراقى ئیدانەى تیرۆرکردنى رۆژنامەنووس سۆران مامەحەمە دەکات
|
بەیاننامەى ناڕەزایى(کۆمەڵەى عێراقى بۆبەرگریکردن لەمافى رۆژنامەوانان/ بەشى باکور)دژى تیرۆرکردنى ڕۆژنامەنووس(سۆران مامەحەمە)
بۆ/ میدیاکانى ڕاگەیاندن، لایەنەبەرپرسەکان، ڕۆژنامەنوسان و ئازادى خوازان، تەواوى جەماوەرى مرۆڤ دۆست
بەڕێزان، ئێمە لەناوچەى باکورى کۆمەڵەى عێراقى بۆبەرگریکردن لەمافى رۆژنامەوانان بەتوندى ئیدانەى تیرۆرکردنى رۆژنامەنووس(سۆران مامە حەمە)بەرپرسى نوسینگەى کەرکوکى گۆڤارى(لڤین) دەکەین، تیرۆرکردنى ئەم رۆژنامەنووسە وێڕاى ئەوەى پەڵەیەکى رەشە بەناوچەوانى بکوژانى بیرى ئازادو دوژمنانى رۆژنامەگەرى ئازادەوە، زەنگێکى خەتەرناکیشە بۆ مەوداى ئازادى رادەربڕین لەناوچەکەدا، ئەوەمان نیشان دەدات کەهێشتا رۆژنامەنووسان لەژێر هەڕەشەى تیرۆرو قەڵاچۆکردندان، لەکاتێکدا ماوەیەک پێش ئێستا نووسەرو رۆژنامەنووس(عبدالستار تاهیر) هەر لەشارى کەرکوک تیرۆر کراو تائێستاش هەوڵێکى جدى نەدراوە بۆدۆزینەوەى تاوانباران و گەیاندنیان بەسزاى یاسایى.
ئێمە لەناوچەى باکورى کۆمەڵەى عێراقى بۆبەرگریکردن لەمافى رۆژنامەوانان وێڕاى ئیدانەکردنى ئەمکارە نامرۆڤانەیە پشتگیرى خۆمان بۆ تەواوى رۆژنامەنووسان و نووسەران دوپات دەکەینەوەو راى دەگەیەنین کەئەرکێکى یاسایى و ئەخلاقى حکومەت و لایەنە پەیوەندیدارەکانە بەدواداچونى تێرو تەسەلى بۆبکەن و تاوانباران بەسزا بگەیەنرێن و چاوپۆشیان لێ نەکرێت و چیتر بوار نەدرێت بەبەرتەسک کردنەوەى کارى رۆژنامەگەرى و راى ئازاد لەژێر هەرناوێکداو بەهەر بیانوێکەوەبێت، جێگەى ئەسەفیشە ئەمڕۆ ناوچەکەمان بۆتە قەسابخانەیەک بۆ رۆژنامەنووسان و تائێستاش ئاوڕێکى جدى لەم پێشلکارى و دەستدرێژیانە نەدراوەتەوە کە رۆژنامە نووس سۆران مامە حەمە دوا قوربانى ئەو زنجیرە پێشێلکارى و تیرۆرو تۆقاندنەیە.
ئێمە وەک کۆمەڵەى عێراقى بۆبەرگریکردن لەمافى رۆژنامەوانان، پرسەو سەرەخۆشى خۆمان ئاراستەى کەسوکارى رۆژنامەنووسى جوانەمەرگ و هاوڕێ و هاوپیشەکانى دەکەین و دوپاتى هەموو هاوکارى و پشتگیریەک دەکەینەوە بۆ بنەماڵەى رۆژنامەنووسى شەهیدو تەواوى نووسەرو رۆژنامە نووسان لەکوردستان و عێراقدا.
لەکۆتایدا دڵخۆشى خۆمان و رۆژنامەنووسانیش بەوە دەدەینەوە کەشەهیدبونى کاکە سۆران مژدەدەدات بەکۆتایى هاتنى مەرگى دەستەمۆیى و پاشکۆیى و جێگەى شانازیشە بۆتەواوى رۆژنامە نووسان کەئامادەن گیانى خۆیان بەخت بکەن لەپێناوى دەرخستنى روى راستیەکان و ئامانجە پیرۆزەکەیاندا.
ئاسودەی بۆروحى پاکى شەهید سۆران مامە حەمە
پێشەوا سیدا
بەرپرسى بەشى باکورى(کۆمەڵەى عێراقى بۆبەرگریکردن لەمافى رۆژنامەوانان) |
|
|
|
|
|
|
|
